Drejtori Shabani pjesë e punëtorisë të organizuar nga Agjencia e Menaxhimit Emergjent

Drejtori i Drejtorisë për Mbrojtje dhe Shpëtim (DMSH) të Komunës së Gjilanit, Enver Shabani mori pjesë në punëtorinë e organizuar nga Agjencia e Menaxhimit Emergjent (AME), në bashkëpunim me Bankën Botërore, me temën “Përmirësimi i Kuptimit të Rrezikut nga Fatkeqësitë, Parashikimi i Bazuar në Ndikim dhe Paralajmërimi i Hershëm”.

Drejtori i DMS-së tha se punëtoria kishte për qëllim avancimin e njohurive dhe kapaciteteve të institucioneve përgjegjëse në fushën e menaxhimit të rrezikut nga fatkeqësitë, duke u fokusuar në identifikimin dhe kuptimin më të mirë të rreziqeve, parashikimin e ndikimeve të mundshme si dhe zhvillimin dhe forcimin e mekanizmave të paralajmërimit të hershëm.

Drejtori Shabani tha poashtu se gjatë punëtorisë u diskutua për rëndësinë e qasjes së koordinuar ndërinstitucionale në parandalimin dhe zvogëlimin e rrezikut nga fatkeqësitë, si dhe për nevojën e shkëmbimit të informacionit dhe përvojave ndërmjet institucioneve lokale dhe qendrore.

“Pjesëmarrja e Drejtorisë për Mbrojtje dhe Shpëtim në aktivitete të tilla kontribuon në ngritjen e kapaciteteve profesionale dhe institucionale, në përmirësimin e gatishmërisë për përballimin e situatave emergjente dhe në forcimin e mekanizmave për mbrojtjen e jetës së qytetarëve, pronës dhe mjedisit”, ka thënë Shabani.

Sipas tij, Drejtoria për Mbrojtje dhe Shpëtim mbetet e përkushtuar për bashkëpunim të vazhdueshëm me institucionet relevante dhe partnerët ndërkombëtarë, me qëllim të rritjes së sigurisë, parandalimit të rreziqeve dhe forcimit të kapaciteteve për reagim ndaj fatkeqësive. /2LONLINE/