Drejtori Shabani mori pjesë në takimin themelues të Kolegjiumit për Siguri dhe Emergjencë

Drejtori i Drejtorisë për Mbrojtje dhe Shpëtim, në Komunën e Gjilanit, Enver Shabani mori pjesë në Takimin Themelues të Kolegjiumit për Siguri dhe Emergjencë, i organizuar nga Asociacioni i Komunave të Kosovës, në bashkëpunim me drejtoritë për mbrojtje dhe shpëtim të komunave të Kosovës, me përkrahjen e Misionit të OSBE-së në Kosovë.

Ky takim shënoi një hap të rëndësishëm drejt fuqizimit të bashkëpunimit ndërkomunal në fushën e sigurisë dhe menaxhimit të emergjencave. Gjatë takimit u diskutua për koordinimin institucional, shkëmbimin e përvojave dhe avancimin e kapaciteteve për reagim ndaj situatave emergjente.

Në kuadër të takimit u mbajt edhe procesi zgjedhor, ku u zgjodh Kryetari dhe Kryesia e Kolegjiumit për Siguri dhe Emergjencë, e cila do të udhëheqë aktivitetet dhe bashkëpunimin ndërmjet komunave në këtë fushë.

Drejtoria për Mbrojtje dhe Shpëtim mbetet e përkushtuar në forcimin e bashkëpunimit institucional dhe në zhvillimin e kapaciteteve për të garantuar sigurinë dhe mbrojtjen e qytetarëve.  /2LONLINE/