Drejtori Rexhepi takon koordinatorët dhe premton mbështetje për përmirësimin e proceseve vlerësuese

Drejtori i Drejtorisë Komunale të Arsimit në Gjilan, Jeton Rexhepi, ka zhvilluar takimin e radhës njoftues me koordinatorët e cilësisë në shkollat e komunës, me fokus në avancimin e standardeve arsimore dhe përmirësimin e proceseve të brendshme vlerësuese.

Gjatë takimit u theksua rëndësia e sigurimit të cilësisë si një sistem gjithëpërfshirës, i cili ndikon drejtpërdrejt në rritjen e cilësisë së shërbimeve dhe rezultateve në arsim. Koordinatorët e cilësisë, si bashkëpunëtorë profesionalë në shkolla, luajnë një rol kyç në realizimin e vlerësimit të brendshëm të shkollave dhe në vlerësimin e performancës së mësimdhënësve—procese këto thelbësore për zhvillimin institucional.

Në këtë takim u diskutuan edhe sfidat me të cilat përballen koordinatorët gjatë zbatimit të detyrave të tyre, veçanërisht në proceset e vlerësimit. Drejtori Rexhepi ofroi përkrahje të plotë institucionale dhe profesionale për tejkalimin e këtyre vështirësive.

Nga Drejtoria Komunale e Arsimit u theksua se mbetet e përkushtuar në garantimin e funksionimit sa më të mirë të të gjitha hallkave të sistemit arsimor, me synim rritjen e cilësisë dhe profesionalizmit në institucionet shkollore.  /2LONLINE/