Drejtori i Spitalit të Gjilanit viziton pacientët e dializës në Ferizaj, falënderon stafin për kujdesin e ofruar

Drejtori i Spitalit të Përgjithshëm në Gjilan, Afrim Cana, ka zhvilluar një vizitë te pacientët e dializës dhe stafi shëndetësor në Spitalin e Ferizajt, ku aktualisht po ofrohen shërbimet përkatëse, për shkak të renovimit të repartit të dializës në Gjilan.

Gjatë kësaj vizite, drejtori Cana u njoh nga afër me kushtet e trajtimit të pacientëve dhe punën e stafit mjekësor, duke shprehur mirënjohje për përkushtimin dhe profesionalizmin e tyre. Ai theksoi rëndësinë e vazhdimësisë së shërbimeve cilësore, veçanërisht për pacientët që varen nga trajtimi i rregullt i dializës.

Sipas drejtorit, pacientët e dializës, nga ana e tyre, u shprehën të kënaqur me kujdesin dhe shërbimet që po marrin në Ferizaj, duke vlerësuar angazhimin e stafit dhe kushtet e trajtimit gjatë kësaj periudhe të përkohshme.

Me këtë rast, drejtori Cana falënderoi edhe menaxhmentin dhe stafin e Spitalit të Ferizajt për bashkëpunimin dhe mbështetjen e ofruar, duke theksuar se kjo ka qenë thelbësore për garantimin e trajtimit të pandërprerë të pacientëve.

Ai bëri të ditur se, pas përfundimit të punimeve, pacientët pritet të rikthehen së shpejti në Spitalin e Gjilanit, ku shërbimet do të vazhdojnë në kushte të përmirësuara. /2LONLINE/