Drejtori i DKA-së takon psikologët e shkollave – Rëndësia e bashkërendimit të aktiviteteve dhe raportimit të rasteve

Drejtori i Drejtorisë Komunale të Arsimit (DKA) në Gjilan, Jeton Rexhepi zhvilloi një takim pune me psikologët e shkollave të komunës, me qëllim të forcimit të bashkëpunimit dhe koordinimit në trajtimin e çështjeve që lidhen me mirëqenien psikologjike të nxënësve.

Sipas tij, gjatë takimit u diskutua për rëndësinë e rolit të psikologëve në institucionet arsimore, veçanërisht në identifikimin dhe trajtimin e hershëm të sfidave me të cilat përballen nxënësit, si problemet emocionale, sociale apo të sjelljes.

U theksua se bashkërendimi i aktiviteteve ndërmjet psikologëve, drejtuesve të shkollave dhe Drejtorisë së Arsimit është thelbësor për krijimin e një mjedisi të sigurt dhe mbështetës për nxënësit.

“Një vëmendje e veçantë iu kushtua edhe mekanizmave të raportimit të rasteve. Psikologët u inkurajuan që rastet që kërkojnë ndërhyrje institucionale të raportohen në mënyrë të rregullt dhe profesionale, duke respektuar procedurat dhe standardet e konfidencialitetit. Kjo mundëson reagim më të shpejtë dhe koordinim më të mirë me institucionet përkatëse”, ka thënë drejtori Rexhepi.

Po ashtu, sipas tij, u diskutua për organizimin e aktiviteteve vetëdijesuese në shkolla që lidhen me shëndetin mendor, parandalimin e dhunës, bullizmit dhe mbështetjen psikosociale të nxënësve.

Në përfundim të takimit, drejtori i DKA-së falënderoi psikologët për angazhimin dhe profesionalizmin e tyre, duke theksuar se bashkëpunimi i vazhdueshëm dhe raportimi i rregullt janë çelësi për përmirësimin e shërbimeve mbështetëse për nxënësit dhe për ngritjen e cilësisë së jetës shkollore.  /2LONLINE/