Drejtori i DKA-së mirëpret përfaqësuesit e projektit të Qeverisë Gjermane “Aftësim për Tregun e Punës”

Drejtori i Drejtorisë Komunale të Arsimit në Gjilan, Jeton Rexhepi priti sot në takim përfaqësuesit e projektit të Qeverisë Gjermane “Aftësim për Tregun e Punës”, i cili zbatohet nga Deutsche Gesellschaft für Internationale Zusammenarbeit (GIZ).

“Gjatë takimit u diskutua për zhvillimin dhe zbatimin e arsimit dual profesional në Komunën e Gjilanit, si një model që ndërlidh mësimin teorik në shkollë me praktikën profesionale në kompani private. Një ndër temat kryesore ishte edhe diplomimi i gjeneratës së dytë të nxënësve në profilet automekanik dhe kuzhinier, një arritje e rëndësishme në avancimin e arsimit profesional dhe përgatitjen e të rinjve për tregun e punës”, ka thënë drejtori Rexhepi.

Në takim morën pjesë edhe përfaqësues të dy shkollave të mesme profesionale, “Mehmet Isai” dhe “Sahit Baftiu”, të cilët ndanë përvojat e tyre në zbatimin e këtij modeli arsimor.

“Drejtoria Komunale e Arsimit në Gjilan mbetet e përkushtuar për zhvillimin e mëtejmë të arsimit profesional, ndërsa arsimi dual mbetet një nga prioritetet kryesore në arsimin e mesëm të lartë të komunës”, ka thënë Jeton Rexhepi, drejtor i DKA-së në Gjilan.  /2LONLINE/