Drejtori i Arsimit viziton akademinë profesionale në Iowa: Model frymëzues për ndërlidhjen e arsimit me tregun e punës

Drejtori i Drejtorisë Komunale të Arsimit në Gjilan, Jeton Rexhepi, i cili po qëndron për vizitë zyrtare në Shtetet e Bashkuara të Amerikës, ka vizituar sot Sioux City Career Academy, një institucion i njohur për qasjen moderne në arsimin profesional dhe teknik.

Gjatë vizitës, drejtori Rexhepi u njoh nga afër me organizimin e akademisë, programet profesionale dhe mënyrën se si nxënësit përgatiten për tregun e punës përmes praktikës profesionale dhe bashkëpunimit të ngushtë me bizneset lokale. Në kuadër të kësaj akademie funksionojnë një numër i madh drejtimesh profesionale, të cilat u ofrojnë të rinjve aftësi konkrete dhe mundësi të menjëhershme punësimi.

Vizita u fokusua veçanërisht në modelin e ndërlidhjes së arsimit me nevojat reale të tregut të punës, si dhe në përgatitjen e nxënësve për profesionet dhe sfidat e së ardhmes.

“Modele të tilla të arsimit profesional tregojnë qartë se sa e rëndësishme është që shkollat të jenë të lidhura ngushtë me zhvillimet ekonomike dhe kërkesat e tregut të punës. Përvojat që po shohim këtu janë shumë të vlefshme dhe do të na shërbejnë si inspirim për avancimin e arsimit profesional edhe në komunën tonë”, ka thënë drejtori Rexhepi.

Gjatë takimeve në akademi u diskutuan edhe mundësitë e bashkëpunimit dhe shkëmbimit të përvojave në fushën e arsimit profesional, me synim ngritjen e cilësisë në arsim dhe krijimin e mundësive më të mira për të rinjtë e Gjilanit. /2LONLINE/