Drejtori i Arsimit takon mësimdhënësit e praktikës profesionale në Kamenicë
Drejtori i Drejtorisë së Arsimit në Komunën e Kamenicës, Selami Klaiqi, ka zhvilluar një takim me mësimdhënësit e praktikës profesionale nga IAAP “Andrea Durrsaku” dhe ShMLM “Sejdi Kryeziu”.
Në këtë takim u diskutua për rëndësinë e përgatitjes praktike të nxënësve, sfidat që hasen gjatë procesit mësimor si dhe mundësitë për avancimin e cilësisë në arsimin profesional.
Drejtori Klaiqi theksoi se një ndër prioritetet kryesore të Kryetarit Kadri Rahimaj, mbetet përgatitja e nxënësve të shkollave profesionale për tregun e punës, duke i pajisur ata me njohuri dhe shkathtësi praktike.
Gjithashtu në takim u theksua rëndësia e bashkëpunimit të vazhdueshëm mes shkollave dhe bizneseve lokale, në mënyrë që nxënësit të kenë më shumë mundësi për të ndjekur praktikat profesionale dhe për të fituar përvojë të drejtpërdrejtë në fushat e tyre. /2LONLINE/