Drejtori Huruglica: Takim pune lidhur me projektin e Zonës Ekonomike në Komunën e Gjilanit

Drejtori i Drejtorisë për Zhvillim Ekonomi, në Komunën e Gjilanit, Haki Huruglica ka pritur në takim përfaqësuesit e Ministrisë së Industrisë, Ndërmarrësisë, Tregtisë dhe Inovacionit (MINT)

“Me përfaqësuesit e Ministrisë së Industrisë, Ndërmarrësisë, Tregtisë dhe Inovacionit (MINT), z. Armend Vehapi dhe z. Nol Buzhala, zhvilluam një takim pune lidhur me projektin e Zonës Ekonomike në Komunën e Gjilanit”, ka thënë drejtori Huruglica.

Sipas tij, takimi i sotëm kishte për qëllim koordinimin e hapave konkretë dhe përfundimin e procedurave të nevojshme, në mënyrë që ky projekt të realizohet sa më shpejt që është e mundur.

Huruglica ka thënë se Zona Ekonomike përfaqëson një nga projektet më të rëndësishme për zhvillimin ekonomik të Gjilanit, pasi krijon një hapësirë të dedikuar për zhvillimin e veprimtarive ekonomike, tërheqjen e investimeve të reja, zgjerimin e bizneseve ekzistuese dhe krijimin e vendeve të reja të punës.

Realizimi i saj padyshim që do të ndikojë në rritjen e aktivitetit ekonomik dhe në krijimin e një mjedisi më të favorshëm për investitorët vendorë dhe të huaj.

“Në këtë drejtim, diskutuam edhe obligimet dhe hapat që dalin nga Vendimi nr. 04/20 i Qeverisë së Republikës së Kosovës, si dhe Marrëveshja e Bashkëpunimit ndërmjet MINT-it dhe Komunës së Gjilanit.  E falënderoj MINT-in, veçanërisht z. Armend Vehapi dhe z. Nol Buzhala, për bashkëpunimin dhe gatishmërinë për koordinim të vazhdueshëm.  Do të vazhdojmë të punojmë me përkushtim për përfundimin e procedurave që janë në kompetencën tonë, me synim që ky projekt strategjik të kalojë sa më shpejt në fazën e realizimit”, ka thënë Haki Huruglica.

Ai theksoi se ky mbetet prioritet kryesor i Komunës së Gjilanit /2LONLINE/