Drejtori Edon Dërmaku viziton bizneset e Kamenicës në panairin “AGROKOS & Agroturizëm 2026”
Drejtori i Drejtorisë për Zhvillim Ekonomik dhe Diasporë, në Komunën e Kamenicës. Edon Dërmaku, ka vizituar bizneset e Kamenicës që po marrin pjesë në panairin “AGROKOS & Agroturizëm 2026”, i mbajtur më 3 dhe 4 qershor.
Gjatë vizitës, drejtori Dërmaku ka theksuar rëndësinë e promovimit të produkteve vendore dhe mbështetjen që Komuna e Kamenicës po u ofron bizneseve lokale për zhvillimin dhe zgjerimin e aktivitetit të tyre.
Në këtë edicion të panairit, me mbështetjen e Komunës së Kamenicës, janë prezantuar katër biznese prodhuese dhe përpunuese, të cilat përfaqësojnë potencialin ekonomik dhe cilësinë e produkteve vendore. Pjesëmarrëse në panair ishin bizneset: Apiflor me produktet e mjaltit, Raif Shurdhani me djathin artizanal, Ardi me produktet e përpunuara të mishit dhe Aroma Premium me melmesa cilësore.
Sipas drejtorit Dërmaku, panaire të tilla krijojnë mundësi të rëndësishme për promovimin e produkteve lokale, shkëmbimin e përvojave, krijimin e partneriteteve të reja dhe zgjerimin e tregjeve për bizneset e Kamenicës.
Ai ka ritheksuar se Komuna e Kamenicës mbetet e përkushtuar në mbështetjen e sektorit privat përmes subvencioneve, trajnimeve profesionale, programeve zhvillimore dhe promovimit të bizneseve brenda dhe jashtë vendit.
“Bizneset e Kamenicës janë ambasadorët më të mirë të punës, cilësisë dhe potencialit të komunës sonë”, ka thënë drejtori Dërmaku. /2LONLINE/