Drejtori Cana mirëpret majorin Türkoğlu dhe nënoficerin Yünlüm

Menaxhmenti i Spitalit të Përgjithshëm në Gjilan priti në takim përfaqësuesit e KFOR-it Turk në Kosovë, Komandantin e LMT Majorin Erhan Türkoğlu dhe nënoficerin Ekrem Yünlüm.

Drejtori ekzekutiv i Spitalit të Përgjithshëm në Gjilan, Dr.Afrim Cana, iu dëshiroi mirëseardhje përfaqësuesve të KFOR it Turk duke i falënderuar për kontributin e dhënë në Shëndetësinë e Republikës së Kosovës.

“Ofrimi i donacioneve nga KFOR i Turk dhe organizatat e tjera nga shteti i Turqisë forcojnë bashkëpunimin tonë dhe rrisin efikasitetin në ofrimin e shërbimeve shëndetësore dhe ato administrative – ndihmëse teknike, ju keni qenë në vazhdimësi të angazhuar për bashkëpunim me institucionet shëndetësore dhe sigurisht se do të vazhdojmë këtë bashkëpunim i cili do të ju shërbej më së shumti stafit dhe pacientëve, gjithashtu shërbimet tona janë në dispozicion 24/7 për të gjithë ata që kanë nevojë për ndihmë mjekësore”, ka thënë drejtori Cana.

Komandanti i LMT Majori Erhan Türkoğlu tha se janë shumë të kënaqur me bashkëpunimin që kanë me të gjitha institucionet në Kosovë e në veçanti me ato shëndetësore dhe arsim.

“Komandanti njoftoi se janë në përfundim të procedurave për një donacion të ri i cili do të rrit kapacitetet në shërbimin teknik – Rrobalarje në Spitalin e Përgjithshëm në Gjilan”, u bë e ditur në këtë takim.

Në këtë takim u diskutua edhe për shkëmbimin e përvojave të ndryshme të cilat ndihmojnë shumë në përmirësimin e cilësisë së shërbimeve në Spitalin e Përgjithshëm në Gjilan.  /2LONLINE/