Drejtoresha Eljesa Rashiti vlerëson kuvendarët që miratuan shtatë propozimet e Drejtorisë për Gjeodezi, Kadastër dhe Pronë

Kuvendi Komunal i Gjilanit, në seancën e VIII të mbajtur të enjten, ka miratuar shtatë propozime të Drejtorisë për Gjeodezi, Kadastër dhe Pronë. Drejtoresha e kësaj drejtorie, Eljesa Rashiti, ka falënderuar stafin e drejtorisë për angazhimin dhe këshilltarët komunalë për mbështetjen e propozimeve, transmeton Portali 2LONLINE.

Sipas saj, në kuadër të kësaj seance, janë miratuar dy propozim-vendime për dhënien në shfrytëzim afatgjatë të pronave komunale të destinuara për ndërtim. Në këmbim, Komuna përfiton 30 për qind të hapësirës së ndërtimit që i takon pjesës së saj të pronës, duke siguruar përfitime konkrete nga shfrytëzimi i pronës komunale.

Gjithashtu, është miratuar propozim-vendimi për sigurimin e 5,575 m² tokë në Lladovë për zgjerimin e varrezave të fshatit, duke adresuar një nevojë të kahmotshme të komunitetit.

Për mbrojtjen e natyrës, ripyllëzimin dhe rekreacionin, Kuvendi ka miratuar tri propozim-vendime për shpalljen e interesit të ligjshëm publik, me qëllim sigurimin e tokës në Zhegër, me sipërfaqe prej 7,032 m², në Lladovë, me 2,142 m², dhe në Stançiq, me 1,162 m².

Pjesë e vendimeve të miratuara është edhe ndarja e dy hektarëve pronë komunale në Zhegër për ndërtimin e Muzeut dhe Kullës “Agim Ramadani”, në funksion të ruajtjes së kujtesës historike dhe nderimit të veprës së heroit.

“Këto vendime synojnë përdorimin e pronës në funksion të zhvillimit të komunës, mbrojtjes së mjedisit dhe përmbushjes së nevojave të qytetarëve”, ka thënë Eljesa Rashiti, drejtoresha e Drejtorisë për Gjeodezi, Kadastër dhe Pronë, në Komunën e Gjilanit.  /2LONLINE/