Drejtoresha Eljesa Rashiti: Interesimi i lartë i qytetarëve në dëgjim publik dëshmon rëndësinë e Rindërtimit të Kadastrit

Drejtoresha e Drejtorisë për Kadastër, Gjeodezi dhe Pronë, në Komunën e Gjilanit, Eljesa Rashiti, ka bërë me dije se në dëgjimin publik në Livoç të Epërm, pati një pjesëmarrje të lartë të qytetarëve, që, siç u shpreh ajo, “reflekton interesimin dhe rëndësinë që kanë çështjet pronësore dhe të trashëgimisë për komunitetin”.

Gjatë këtij takimi, drejtoresha Rashiti theksoi rëndësinë e procesit të Rindërtimit të Kadastrit (RIK), si një mekanizëm kyç për zgjidhjen e çështjeve të kahershme pronësore dhe për krijimin e një sistemi më të drejtë dhe transparent.

“Drejtoria e Kadastrit falënderon të gjithë qytetarët për pjesëmarrjen aktive dhe kontributin e tyre në këtë proces të rëndësishëm. Njëkohësisht, ftojmë qytetarët që të vazhdojnë të jenë po kaq të angazhuar edhe në dëgjimet e radhës, duke ndihmuar në ndërtimin e një procesi të drejtë, transparent dhe në shërbim të interesit publik”, ka thënë drejtoresha Eljesa Rashiti.  /2LONLINE/