Dogana: Pikëkalimi Kufitar i Mendares është i pajisur me teknologji moderne të kontrollit
“Zyrtarët e Doganës së Kosovës janë të angazhuar 24 orë në ditë, gjatë gjithë vitit, duke realizuar kontrolle doganore në hyrje dhe dalje nga territori i Republikës së Kosovës. Kontrollet zhvillohen në përputhje me procedurat ligjore dhe bazuar në vlerësimin e riskut, me qëllim identifikimin dhe parandalimin e mallrave të padeklaruara, mallrave të ndaluara apo të kufizuara, kontrabandës dhe shkeljeve të tjera doganore”, thuhet në njoftimin e Doganës.
Për realizimin e kontrolleve sa më efikase, Pikëkalimi Kufitar i Mendares është i pajisur me teknologji moderne të kontrollit, ku përfshihen:
-Skaneri RAPISCAN, i cili mundëson skanimin dhe ekzaminimin e automjeteve të udhëtarëve, autobusëve dhe automjeteve të transportit të mallrave, duke ndihmuar në identifikimin e parregullsive dhe mallrave të fshehura.
-Skaneri për valixhet e udhëtarëve, i cili mundëson kontrollin e bagazheve dhe identifikimin e mallrave që mund të jenë objekt i kufizimeve apo deklarimit doganor.
Përdorimi i këtyre pajisjeve teknologjike, në kombinim me profesionalizmin dhe përkushtimin e zyrtarëve doganorë, kontribuon në forcimin e kontrolleve kufitare, parandalimin e aktiviteteve të kundërligjshme dhe lehtësimin e qarkullimit të rregullt të udhëtarëve dhe mallrave.
“Dogana e Kosovës mbetet e përkushtuar për kontrolle efikase, zbatim të ligjit dhe mbrojtjen e interesave ekonomike dhe sigurisë së vendit”, thuhet në njoftimin e Doganës. /2LONLINE/
