Dogana e Kosovës parandalon një rast të kontrabandës me mallra në Qafë Prush

Zyrtarët doganorë të Doganës së Kosovës, në bashkëpunim me Policinë e Kosovës, kanë parandaluar një rast të tentim-kontrabandimit të mallrave në Pikën e Kalimit Kufitar Qafë Prush.

Gjatë kontrollit të automjeteve në hyrje të Republikës së Kosovës, një automjet është përzgjedhur për kontroll doganor. Gjatë intervistimit nga zyrtarët doganorë, drejtuesi i automjetit ka deklaruar se nuk posedonte mallra apo mjete monetare për deklarim.

Megjithatë, gjatë kontrollit të detajuar, të realizuar në bashkëpunim me Policinë e Kosovës, janë zbuluar 504 copë Barium Sulfate (Bariumsulfate) të padeklaruara, të fshehura në bagazhin e automjetit.

Me këtë rast, është konstatuar se personi ka tentuar të fusë mallra në territorin doganor të Republikës së Kosovës pa i paraqitur ato për kontroll dhe pa përmbushur detyrimet ligjore të deklarimit, duke kryer kundërvajtje doganore në kundërshtim me dispozitat e Kodit Doganor dhe të Akcizave Nr. 08/L-247, i cili obligon çdo person që fut mallra në territorin doganor të Republikës së Kosovës t’i paraqesë dhe t’i deklarojë ato pranë autoriteteve doganore.

Mallrat janë ndaluar dhe sekuestruar nga Dogana e Kosovës, ndërsa ndaj rastit do të zhvillohen procedurat e mëtejshme administrative dhe kundërvajtëse, në përputhje me legjislacionin doganor në fuqi.

Dogana e Kosovës mbetet e përkushtuar në zbatimin e Kodit Doganor dhe të Akcizave Nr. 08/L-247, mbrojtjen e interesave financiare të Republikës së Kosovës, luftimin e kontrabandës dhe ekonomisë joformale, si dhe garantimin e konkurrencës së ndershme në treg. Në bashkëpunim të ngushtë me Policinë e Kosovës dhe institucionet e tjera të zbatimit të ligjit, Dogana do të vazhdojë të ndërmarrë masa të vendosura për parandalimin dhe goditjen e çdo forme të veprimtarisë së kundërligjshme në pikat kufitare dhe në gjithë territorin e Republikës së Kosovës, thuhet në njoftimin e Doganës.  /2LONLINE/