Organizata e Veteranëve të Luftës (OVL) së UÇPMB-së në Preshevë në koordinim me Shoqërinë Civile në këtë komunë, organizon protestë gjithë-popullore.
Këshilli organizativ përmes një njoftimi fton popullatën e kësaj komune dhe më gjerë, që të marrin pjesë në protestën e paraparë të mbahet të premten, 18 shtator, me fillim në orën 11:00.
OVL dhe Shoqëria Civile, përmes këtij tubimi protestues kërkojnë ndalimin e dëbimit të shqiptarëve nga komunat Preshevë, Bujanoc dhe Medvegjë si dhe dhunën, diskriminimin që po vazhdon ndaj banorëve të këtushëm, transmeton Titulli.com.
Gjithashtu, sipas njoftimit të Këshillit organizativ, protesta gjithë-popullore do të shprehë edhe pakënaqësitë për veprimet e deritanishme të vetëqeverisjes lokale në Preshevë.
Ata kërkojnë kthimin e lapidarit të dëshmorëve të UÇPMB-së i hequr nga sheshi kryesor, para godinës së administratës komunale, sikurse shprehin pakënaqësinë për dhënien e mirënjohjes kryeministrit të Serbisë, Aleksandar Vuçiq nga kryetari Ragmi Mustafa.
Protesta e së premtes do të nisë marshin nga shkolla e mesme për në qendër, para godinës së administratës lokale, në Sheshin e Dëshmorëve.
