Dita Botërore e Hipertensionit shënohet në QKMF-të e Komunës së Gjilanit

Në të gjitha Qendrat Kryesore të Mjekësisë Familjare (QKMF) të Komunës së Gjilanit u shënua Dita Botërore e Hipertensionit, përmes aktiviteteve sensibilizuese të organizuara nga stafi shëndetësor.

“Matni tensionin e gjakut me saktësi, kontrolloni atë, jetoni më gjatë”, thuhet në njoftimin e QKMF-së së Gjilanit.

Gjatë këtij aktiviteti, qytetarëve iu ofrua shërbim falas për matjen e tensionit arterial, si dhe këshilla të shkurtra shëndetësore, me qëllim të ngritjes së vetëdijes për parandalimin dhe menaxhimin e hipertensionit – një nga faktorët kryesorë të rrezikut për sëmundje kardiovaskulare.

Ky aktivitet reflekton përkushtimin e vazhdueshëm të profesionistëve shëndetësorë për promovimin e shëndetit publik dhe ndërgjegjësimin e komunitetit për kujdesin ndaj shëndetit të zemrës, thuhet në njoftimin e QKMF-së. /2LONLINE/