Diskutojnë për të drejtat e punëkërkuesve

Të drejtat e punëkërkuesve, qasja e barabartë në shërbimet e punësimit dhe sfidat në tregun e punës kanë qenë në fokus të një takimi të zhvilluar në Zyrën e Punësimit në Gjilan.

Udhëheqësi i Zyrës së Punësimit në Gjilan, Petrit Vokshi, priti në takim përfaqësuesin e Avokatit të Popullit, Shemsedin Mustafa, me të cilin diskutoi çështje që lidhen me garantimin e të drejtave të qytetarëve gjatë ofrimit të shërbimeve të punësimit.

Vokshi tha se në takim është diskutuar veçanërisht për rëndësinë e trajtimit të barabartë të të gjithë punëkërkuesve dhe parimit të mosdiskriminimit.

“Diskutuam për të drejtat e punëkërkuesve, qasjen e barabartë në shërbimet e punësimit, mosdiskriminimin dhe sfidat që paraqiten në tregun e punës”, tha Vokshi.

Sipas tij, takimi ishte i rëndësishëm edhe për shkëmbimin e informatave dhe forcimin e bashkëpunimit ndërmjet institucioneve, me synim adresimin më efektiv të çështjeve që prekin qytetarët, .

“Bashkëpunimi institucional është i rëndësishëm për adresimin sa më efektiv të çështjeve që lidhen me të drejtat e qytetarëve dhe për ofrimin e shërbimeve sa më cilësore”, theksoi Vokshi. /2LONLINE/