Diskutojnë për reformat e planifikuara në sektorin e shëndetësisë

Drejtues të Drejtorisë së Shëndetësisë dhe Mirëqenies Sociale (DSHMS), në Komunën e Gjilanit kanë bërë me dije se sot u mbajt takimi me përfaqësuesit e subjekteve politike, me qëllim të diskutimit të reformave të planifikuara në sektorin e shëndetësisë në Komunën e Gjilanit.

Drejtoresha e Shëndetësisë dhe Mirëqenies Sociale, Mimoza Kadriu Qerimi ka bërë ne dije se gjatë takimit u prezantuan analizat dhe arsyetimet që mbështesin nevojën për riorganizimin e shërbimeve shëndetësore, me fokus në shfrytëzimin më efikas të burimeve njerëzore dhe materiale, përmirësimin e qasjes së qytetarëve në shërbime dhe ngritjen e cilësisë së kujdesit shëndetësor.

Sipas saj, pjesëmarrësit patën mundësinë të paraqesin qëndrimet, sugjerimet dhe vërejtjet e tyre lidhur me procesin e reformave, duke kontribuar në një diskutim konstruktiv dhe transparent.

“Drejtoria e Shëndetësisë dhe Mirëqenies Sociale mbetet e përkushtuar që çdo ndryshim dhe reformë të ndërmerret në interes të qytetarëve, duke u bazuar në analiza profesionale, nevoja reale të popullatës dhe parimet e ofrimit të shërbimeve cilësore shëndetësore”, ka thënë drejtoresha e DSHMS-së, Mimoza Kadriu Qerimi.  /2LONLINE/