Diskutohet shkëmbimi elektronik i të dhënave ndërmjet Inspektoratit Policor të Kosovës dhe prokurorive

Kryesuesi i Komisionit për Çështje Normative të Këshillit Prokurorial të Kosovës (KPK), z. Visar Krasniqi, i shoqëruar nga Udhëheqësi i Departamentit të Teknologjisë Informative, z. Nexhat Haziri, kanë mbajtur sot një takim me Kryeshefin e Inspektoratit Policor të Kosovës (IPK), z. Kushtrim Hodaj.

Qëllimi i këtij takimi ishte diskutimi i shkëmbimit elektronik të të dhënave ndërmjet IPK-së dhe prokurorive përmes Sistemit për Menaxhimin Informativ të Lëndëve (SMIL). Ky proces synon rritjen e efikasitetit dhe transparencës, si dhe mundësimin e digjitalizimit të plotë të shkëmbimit të të dhënave ndërmjet institucioneve të drejtësisë dhe atyre të zbatimit të ligjit.

Gjatë takimit, z. Krasniqi dhe z. Hodaj, theksuan rëndësinë e këtij transformimi digjital si një hap i domosdoshëm për përshpejtimin e procedurave hetimore dhe administrative, koordinimin më të mirë ndërmjet IPK-së dhe sistemit prokurorial, si dhe, eliminimin e barrierave teknike në menaxhimin e lëndëve.

Në përmbyllje të takimit, bashkëbiseduesit u pajtuan që në takimet e radhës të trajtohen modalitetet teknike dhe hapat konkretë që duhet të ndërmerren për realizimin e shkëmbimit elektronik ndërmjet institucioneve. /2LONLINE/