Diskutohet për projektet që janë duke u realizuar aktualisht si dhe potencialin që ka Kamenica për avancimin e sportit

Ministri i Ministrisë së Sportit dhe Rinisë, Blerim Gashani, ka qëndruar për vizitë në Komunën e Kamenicës, ku është takuar me Kryetarin e Komunës, Kadri Rahimaj, për të diskutuar mbi zhvillimin e sportit dhe projektet infrastrukturore në këtë komunë.

Sipas tij, gjatë takimit u diskutuan dhe shqyrtuan projektet që janë duke u realizuar aktualisht, si dhe potenciali që ka Kamenica për avancimin e sportit dhe përfshirjen më të madhe të të rinjve në aktivitete sportive.

Në kuadër të vizitës, ministri Gashani vizitoi nga afër disa prej objekteve kryesore sportive, përfshirë Palestrën e Sportit, stadiumin e qytetit, ku u prezantuan ide dhe plane konkrete për zhvillimin e mëtejmë të stadiumit të qytetit, për të cilat u ofrua mbështetje institucionale.

Ministri po ashtu vizitoi edhe stadiumin e KF “Kika” në Hogosht, si dhe Stadiumin e Atletikës, i cili përbën një nga investimet më të mëdha kapitale në sport në këtë komunë.

“Ministria e Sportit dhe Rinisë mbetet e përkushtuar në përkrahjen e projekteve që kontribuojnë në zhvillimin e sportit dhe krijimin e kushteve më të mira për sportistët në të gjithë vendin”, ka thënë ministri Gashani.

Nga ana e tij, kreu i Komunës së Kamenicës, kadri Rahimaj ka thënë se kjo komunë po vazhdon angazhimin e saj për zhvillimin e sportit përmes bashkëpunimit me institucionet qendrore.

Në këtë takim u diskutua rreth projekteve aktuale në fushën e sportit, dhe për zhvillimin e mëtejmë të kësaj fushe.

Sipas Rahimaj, gjatë takimit u prezantuan ide dhe plane konkrete për avancimin dhe zhvillimin e mëtejmë të stadiumit të qytetit, për të cilat niveli qendror dha mbështetje të plotë për komunën.

“Komuna e Kamenicës mbetet e përkushtuar në realizimin e projekteve të mëdha sportive, me synim përmirësimin e kushteve për sportistët dhe promovimin e aktiviteteve sportive në nivel lokal dhe më gjerë”, ka thënë i pari i Kamenicës, Kadri Rahimaj.  /2LONLINE/