Diskutimi publik për buxhetin ka vazhduar në Pozheran e Tërpezë

/2L ONLINE/ – Diskutimet publike për planifikimin e buxhetit për vitin 2016-2018, janë mbajtur në Pozheran dhe Tërpezë, ku banorët kanë paraqitur kërkesat për projektet prioritare në lokalitetet e tyre. Në të dy takimet, drejtori i Drejtorisë për Financa, Ekonomi dhe Zhvillim Ibrahim Rama, njoftoi për buxhetin komunal dhe procedurat e miratimit tij.

Ndërsa Hasan Aliu zv.kryetari i komunës së Vitisë ka theksuar angazhimin institucional në ndarjen e drejtë të buxhetit në gjitha lokalitetet sipas prioriteteve që paraqiten nga vetë banorët.

Naim Pira kryesues i Kuvendit komunal të Vitisë, ka thënë se Kuvendi do të marrë hapat ligjor, ndërsa u shpreh se Institucionet do të jenë të angazhuara që edhe përmes donacioneve dhe grandeve qeveritare të arrihet të plotësohen nevojat dhe kërkesat e banorëve që paraqiten.

Madje ai përmendi premtimet në Pozheran që siç tha, janë duke u konkretizuar dhe do të realizohen. Në Pozheran u përmend si prioritet ndërtimi i objektit të shkollës fillore, përfundimi i rrjetit të kanalizimit në të gjitha lagjet, trotuari përgjatë rrugës Pozheran-Viti përbrenda fshatit, mundësia për rregullimin të rrugëve bujqësore etj.
Ndërsa në Tërpezë, kanë kërkuar riparimin e rrjetit të ujësjellësit, rregullimi dhe asfaltimi i disa rrugëve të fshatit që janë në gjendje të keqe, rruga bujqësore Tërpezë-Zhiti, ndërtimi I fushës sportive etj./2L ONLINE/