Diskutim online rreth përfshirjes së Diasporës në politik-bërje të Kosovës

/2L ONLINE/ – Platforma digjitale, KosovoDiaspora.org do të organizojë një diskutim virtual rreth angazhimit të diasporës si burim të politikë-bërjes në Kosovë dhe Shqipëri.

Takimi do të zhvillohet në mënyrë virtule nëpërmjet Google Hangout, më 6 qershor,2015, duke filluar nga ora 16:00.

Temë e diskutimit do të jetë “Roli dhe Angazhimi I Diasporës si element i rëndësishëm në procesin e politikë-bërjes në Shqipëri dhe Kosovë”.

Liza Gashi, në emër të Kosovodiaspora.org , ka bërë të ditur se ky panel virtual ka për qëllim të bashkojë përfaqësues të ndryshëm që janë pjesë e proceseve politikë-bërëse, aktivizmit si dhe njëherësh anëtarë të shoqërisë civile.

Ajo ka thënë se gjatë debatit do të diskutohen çështje te rëndësishme me karakter të ndryshëm mbi diasporën shqiptare.

Pjesë e panelit-diskutes do të jenë : Vlora Çitaku, Besa Shahini, Avni Mustafaj, Jetmir Bakija, Donika Hoxha, Adi Hoxha, Indira Kartallozi , Nuhi Peci dhe Behar Xharra.

“Kontributi juaj në këtë diskutim do të jetë i rëndësishëm në ngritjen e bashkëpunimit me diasporën duke i kontribuar Shqipërisë dhe Kosovës. Ju mund të na bashkoheni në këtë diskutim përmes link-ut të mëposhtëm:
https://plus.google.com/events/c5pauh8tvjioqhuk0dhacv9fuio”, ka thënë Liza Gashi.

Përndryshe, ajo ka bërë të ditur se organizator i forum-diskutimit është OJQ-ja Germin në bashkëpunim me Organizatën Ndërkombëtare për Migrim (IOM), Zyrën për Zhvillime të Kombeve të Bashkuara (UNDP) dhe Ministrinë e Diasporës së Kosovës (MeD).

Germin është OJQ e cila përdor teknologjinë si trajektore për të bashkuar dhe mbështetur Diasporën Shqipëtare me vendlindjen e tyre. Germin, njëherit është themelues dhe menaxhon www.kosovodiaspora.org, një platformë digjitale informuese mbi angazhimin e Diasporës Shqiptare nëpër botë. /2L ONLINE/