Diaspora është e Kosovës!

Shkruan: Arsim Kastrati

Diaspora nuk është e asnjë partie politike, ajo ka qenë dhe do t’mbetet krahu i djathtë i familjes, shoqërisë dhe shtetit të Kosovës.

Edhe Serbia ka pas tentuar ta luaj lojën e saj me diasporën e Kosovës po si ka dalë mirë.

Gatdi se gjysma e familjarëve të kosovarëve të sotëm jetojnë në Europën Perëndimore dhe pushimet i kalojnë në Kosovë, si pjesa dërmuese e Shqiptarëve në Ballkan, me ç’rast një pjesë e mirë e fitimeve të tyre harxhohet këtu në vendlindjen e tyre, në vendlindjen prindërve e të gjyshërve të tyre, duke e ndihmuar në këtë mënyrë ekonominë e vendit, aq sa jodashamirëve të Kosovës gjithnjë iu ka penguar e iu pengon edhe sot.

Këta familjarë tanë marrin pjesë edhe në zgjedhjet parlamentare dhe lokale të Republikës së Kosovës, duke vepruar edhe në këtë aspekt, me vullnetin dhe qëllimin e mirë për përparimin e kësaj republike të shenjtë për të gjithë Shqiptarët gjithandej.

A do të ishte më mirë që diasporës t’i caktohet një numër ulësesh në parlament dhe ajo t’i kandidojë e votojë njerëzit tanë nga gjiri i saj në diasporë, apo të vazhdojë e të votoj sipas mënyrës së tanishme, kjo përveç se është çështje e një reforme të përgjithshme elektorale aq të nevojshme për shtetin e Kosovës, është edhe një çështje jo pak e rëndësishme për vet diasporën dhe hallet e saj, si në vendet ku jeton e punon pjesën më të madhe të kohës ashtu edhe në vendin ku vije për pushime, e më shpesh.

Ma merr mendja se një numër i caktuar i deputetëve të diasporës në Parlamentin e republikës, që do të angazhohej shumicën e kohës për hallet e diasporës, do të ishte edhe një grup parlamentar shumë i nevojshëm për tejkalimin e ngërçeve të padëshirueshme në punën e parlamentit dhe jo vetëm.

Sido që të jetë, diaspora jonë e ka tagrin që askush s’mund t’ia mohojë, që të interesohet dhe angazhohet për çështjet dhe fatin e shtetit tonë të përbashkët dhe mashtrohen të gjithë ata që mendojnë se ajo vepron symbyllas dhe sipas interesave të ngushta klanore e partiake!  /2LONLINE/