Derbi SC Gjilani – FC Drita përfundon pa gola, Gjilani e shpreson akoma Evropën!

Java e 35-të, e parafundit, e Superligës së Kosovës në Futboll, ka sjellë rezultate interesante dhe emocione të shumta, duke bërë që shumëçka t’i lihet për t’u vendosur xhiros së fundit. Garë e hapur ka mbetur për vendin e tretë, që siguron pjesëmarrje në garat evropiane, por edhe për qartësim të asaj se cila skuadër do të bie nga liga, e cila do të mbetet në barazh.

Kur jemi te dueli i sotshëm i dy skuadrave gjilanase, derbi mes Gjilanit dhe Dritës përfundoi pa gola (0:0).

Siç dihet, Drita tahsmë e ka siguruar titullin e kampionit dhe i mbetet vetëm ta ngiss trofeun dhe ta festojë këtë triumf, ndërsa Gjilani vazhdon të shpresojë për pozitën e tretë që siguron pjesëmarrje në garat evropiane.

Gjilani me pikën e sotme, ka të grumbulluara 50 pikë dhe ndodhet në vendin e katërt, dy më pak se Malisheva që është e treta me 52 pikë dhe një më shumë se Ferizaj, i pesti në tabelë.

Në xhiron e fundit, të 36-tën, Gjilani do të luajë në udhëtim ndaj Ferizajt, ndërsa Malisheva do të luajë në kryeqytet ndaj Prishtinës. Këto takime mund ta përcaktojnë pozitën e tretë.

Ndërkohë, Llapi e Suhareka kërkojnë barazhin. Llapi e mirëpret Dukagjinin e Suhareka – Ballkanin.  /2LONLINE/