Derbi i takoi Dritës

Java e 26-të e Superligës së Kosovës në Futboll solli derbin ndërmjet SC Gjilanit dhe FC Dritës që e fitoi skuadra “bardh e kaltër”, duke marrë me këtë fitore edhe kreun e tabelës së klasifikimit.

Fitorja e Dritës erdhi me rezultat minimal me golin e vetëm që e shënoi Veton Tusha në minutën e fundit të kohës së rregullt të pjesëlojës së parë.

Për më keq, për skuadrën e Gjilanit, që iu prish “matematika” krejtësisht, pas këtij goli, Albin Prapashtica u ndëshkua direkt me të kuq, pas një ndërhyrje ndaj lojtarit kundërshtar, duke e lënë kështu skuadrën e tij komplet në pjesëlojën e dytë me një lojtar më pak, transmeton 2LONLINE.

45 minutat e dyta nuk sollën ndryshim rezultati, duke bërë që  ky derbi t’i takojë Dritës.

Tani, kjo skuadre i prin valles, në Superligë ne Kosovës në Futboll, pasi kryeson tabelën me 48 pikë, tri më shumë se Ballkani që e ndjek pas, derisa në pozitën e tretë tani ka kaluar Prishtina me 41 pikë, e katërta Malisheva me 40 pikë, e Gjilani  i pesti me 39 pikë, e kështu me radhë.  /2LONLINE/