Deputeti Kamberi: Policia multietnike po rrezikon të zhduket

Deputeti shqiptar në Kuvendin e Serbisë, Shaip Kamberi,  përmes një postimi në profilin e tij ka paralajmëruar se Policia multietnike po rrezikon të zhduket, andaj ka kërkuar program të veçantë për punësimin e të rinjve shqiptarë dhe boshnjakë në polici.

Kamberi ka bërë me dije se bashkë me deputetët e SDA nga Sanxhaku, Ahmedin Shkrijel dhe Minela Kalender, kanë inicuar hartimin e një programi të veçantë për punësimin e të rinjve shqiptarë dhe boshnjakë në strukturat policore në të gjitha komunat dhe qytetet ku jetojnë shqiptarët dhe boshnjakët.

Sipas deputetit Kamberi, punësimet e deritanishme, sidomos ato të 10-vjeçarit të fundit, nuk kanë garantuar përfaqësim të drejtë dhe kjo ka zvogëluar dukshëm numrin e shqiptarëve dhe boshnjakëve në polici dhe ka sjellë mospërputhje serioze në strukturën e policisë lokale, duke cenuar besimin dhe ndjenjën e sigurisë tek qytetarët.

“Prandaj në iniciativën që i kemi dërguar Kryeministrit të Serbisë kemi kërkuar që të inicohet Program i veçantë për punësimin e të rinjve shqiptarë dhe boshnjakë si parakusht për ekzistimin e policisë multietnike. Programi i lartëpërmendur të vazhdojë derisa përbërja e policisë të pasqyrojë realisht përbërjen kombëtare të popullsisë në Luginën e Preshevës dhe Sanxhak. Në vitin 2001, me ndërmjetësimin e OSBE-së, u krijua një model i suksesshëm i policisë multietnike që solli stabilitet dhe besim. Sot, është koha të rikthejmë dhe forcojmë këtë model”, ka thënë Kamberi.

Sipas tij, një program i tillë do të përmirësonte sigurinë dhe do të pasqyronte në mënyrë të drejtë strukturën e popullsisë në këto komuna dhe qytete.  /2LONLINE/