Deputetët e Vetëvendosjes vizituan familjet e të vrarëve në Koshtovë e Dumnicë

(2L ONLINE) – Një javë pas vrasjeve që ndodhën në Koshtovë dhe Dumnicë, asnjë përfaqësues i institucioneve qendrore nuk e ka vizituar as familjen Brahimi në Koshtovë, të të vrarit 15-vjeçar dhe dy vëllezërve të plagosur që vazhdojnë kurimin në QKUK, e as familjen Mehmeti, të 44-vjeçarit që u vra në Dumnicë.

Deputetët e Lëvizjes VETËVENDOSJE!, Aida Dërguti, Glauk Konjufca dhe Shqipe Pantina, vizituan familjet e të vrarëve më 27 dhe 29 gusht në Koshtovë të Mitrovicës dhe në Dumnicë të Besianës.

Në të dy familjet diskutimi kryesor ishte ai i sigurimit të të ardhurave. Pamundësisë për të gjetur punë të sigurt e shoqëruar kjo me mungesën gati të plotë të sigurisë së jetës në zonat ku jetojnë e përpiqen të punojnë.

Gjatë vizitës në familjen e të ndjerit Ardian Brahimi në Koshtovë, deputetët e VETËVENDOSJE!-s dëgjuan nga familjarët tmerrin e përjetuar pas sulmit të ndodhur në ora 8:00 të mëngjesit, ku të tre vëllezërit teksa ktheheshin nga mali me traktorin e ngarkuar me dru, ishin sulmuar në territorin e fshatit Koshtovë. Vëllai më i vogël ishte vrarë, kurse dy vëllezërit e tjerë ishin plagosur dhe kishin arritur të shpëtonin vetëm pas thirrjes për ndihmë nga një fqinj i tyre që kishte lajmëruar fshatin dhe policinë. Kjo e fundit kishte ardhur vetëm pas dy orësh, kurse të plagosurit që kishin marrë plagët në orën 8:00, rreth orës 12:00 u dërguan në spital. Gjendja e tyre e rëndë ka pasuar edhe për shkak të gjakderdhjes dhe vonesës së ofrimit të ndihmës.

Për më tepër, deputetët u njoftuan nga familjarët edhe për bisedën që kishin dëgjuar nga policët prezentë, ku shumica e policëve kishin refuzuar të shkonin në vendngjarje duke mos dashur që të përfundojnë si Enver Zymberi.

Po ashtu, edhe në vizitën e bërë familjes së të ndjerit Fatmir Mehmeti në Dumnicë, deputetët e VETËVENDOSJE!-s u njoftuan nga të afërmit për detajet e ngjarjes së ndodhur më 27 gusht në këtë fshat. Ata treguan se i ndjeri Mehmeti po priste dru në mal, si burim i vetëm i të hyrave në familje, për t’i rritur 4 fëmijët e tij. Pra, mungesa e punësimit dhe varfëria e madhe e shtyri të ndjerin që ta bëjë një punë të tillë.

Familjarët e të ndjerit Fatmir Mehmeti ishin tepër të indinjuar me deklaratën e ministrit Bajram Rexhepi, kur ky i fundit tha se xhandarët serbë janë në të drejtën e tyre për t’i mbrojtur pyjet.

Vrasjet e 27 dhe 29 gushtit në fshatrat kufitare janë tregues i rënies gati totale të instrumenteve shtetërore që garantojnë sigurinë fizike, ekonomike e sociale.

Lëvizja VETËVENDOSJE! përveçse u shpreh ngushëllimet për familjarët dhe i uron shërim sa më të shpejtë të plagosurve, iu bën thirrje institucioneve të Kosovës që medoemos të shprehen dhe të marrin masa për këto raste.