Delegacioni i UKZ-së ka zhvilluar takime të rëndësishme në Shqipëri

Delegacioni i Universitetit Publik “Kadri Zeka”,Gjilan, i përbërë nga Prorektori për Bashkëpunim Ndërkombëtar dhe Projekte, prof. dr. Dukagjin Leka dhe Dekani i Fakultetit të Shkencave Sociale, prof. asoc. dr. Selim Daku, zhvilloi një sërë takimesh të rëndësishme me institucione të arsimit të lartë në Shqipëri.

Takimi i parë, me rëndësi të veçantë u mbajt në Universitetin “Aleksandër Moisiu” në Durrës (UAMD), në Fakultetin e Shkencave Politike-Juridike, ku delegacioni u prit nga Dekani, prof. Linert Lirëza, dhe Zëvendësdekania për Shkencë, prof. Belina Bedini.

Në këtë takim u diskutua për nisjen e zhvillimit të një programi të përbashkët bachelor (Double Degree – Diplomë e Dyfishtë) ndërmjet Fakultetit të Shkencave Sociale të UKZ-së dhe Fakultetit të Shkencave Politike-Juridike të UAMD-së.

Programi do të përfshijë mobilitet të integruar të stafit dhe studentëve. Të dy palët u pajtuan që procesi të nisë me krijimin e grupeve punuese dhe hartimin e elementeve kyçe të programit. Po ashtu u diskutua edhe për një program të veçantë shkëmbimi për studentët dhe stafin e të dy institucioneve, bazuar në modelin dhe përvojën e UKZ-së dhe Universitetit PH Zug në Zvicër. Fakulteti i Shkencave Sociale (FShS) dhe Fakulteti i Shkencave Politike-Juridike (FShJ) do të zgjerojnë bashkëpunimin në të gjitha nivelet akademike dhe shkencore.

Gjatë vizitës në Shqipëri, delegacioni realizoi gjithashtu një takim me përfaqësuesit e Universitetit Europian të Tiranës (UET), ku u prit nga znj. Dardane Nuka, koordinatore e disa projekteve ndërkombëtare ku UKZ është partner dhe koordinator. Në këtë kuadër, u diskutua për menaxhimin dhe fazat e projekteve ekzistuese, si projekti DELTA, si dhe për nisjen e projektit të ri dhe shumë premtues MEDIATION, ku UKZ ka rolin e koordinatorit.

Vizita u pasurua më tej me një takim me administratorin e Canadian Institute of Technology (CIT), z. Ubejd Osmani. UKZ dhe CIT, si partnerë të besueshëm, diskutuan për mundësitë e zgjerimit të bashkëpunimit, i cili pritet të konkretizohet edhe përmes programit të ri master mbi E-Privacy, që aktualisht është në zhvillim nga UKZ.

Universiteti Publik “Kadri Zeka” mbetet i përkushtuar për të zhvilluar dhe thelluar bashkëpunimin me institucionet e arsimit të lartë në Shqipëri, duke hapur horizonte të reja për studentët, stafin akademik dhe komunitetin shkencor në të dy anët e kufirit. Ky angazhim është pjesë e vizionit strategjik të UKZ-së për ndërkombëtarizim dhe avancim të cilësisë së arsimit. /2LONLINE/