Debatik Curri për ndeshjen ndaj Ferizajt: Fitorja qëllim i vetëm

Sot zhvillohet ndeshja e javës së 23-të e Superligës së Kosovës në Futboll në mes të Ferizajt dhe Gjilanit, me këtë rast kryetrajneri i skuadrës gjilanase, Debatik Curri ka thënë se e ka të qartë misionin e udhëtimit në Ferizaj, derisa me të besuarit e tij do të jenë në ndjekje të objektivit deri në ndeshjen e fundit kampionale.

Shefi i shtabit teknik është paraqitur në konferencë për shtyp para duelit të radhës kampional, derisa ka vënë në theks rëndësinë e veçantë të kësaj ndeshje.

“Ndeshje e vështirë, pasi që kemi parë se Ferizaj u ka bërë mjaft shumë probleme, madje i ka mposhtur edhe skuadrat nga kreu i tabelës. Për ne është detyrim të angazhohemi dhe të luftojmë, ndërsa fitorja është synimi ynë i vetëm”, ka thënë Curri.

Ai shtoi se ka ende shumë ndeshje deri në fund të kampionatit dhe do të luftojnë deri në ndeshjen e fundit për të arritur objektivin që ka vënë para klubi “kuq e bardh”.

Takimi ndërmjet Ferizajt dhe Gjilanit zhvillohet sot, e hënë me fillim nga ora 13:00 në stadiumin ndihmës në Ferizaj.  /2LONLINE/