Dardanapress mbajti debatin: “Parandalimi i dukurive negative në shkolla”

Organizata Joqeveritare Dardanapress, në kuadër të projektit “Ta ndalojmë dhunën dhe dukuritë negative – Fuqizimi i rinisë për një mjedis të sigurt”, mbajti debatin me temën “Parandalimi i dukurive negative në shkolla”.

Qëllimi i organizimit të debatit ishte krijimi i një hapësire të përbashkët diskutimi ndërmjet drejtuesve të institucioneve arsimore dhe aktorëve të tjerë relevantë, për identifikimin e shkaqeve të dhunës dhe dukurive negative tek të rinjtë, si dhe për hartimin e qasjeve dhe masave parandaluese që kontribuojnë në krijimin e një mjedisi të sigurt, gjithëpërfshirës dhe mbështetës në shkolla.

Gjatë debatit u diskutua për disa nga çështjet kryesore që lidhen me parandalimin e dukurive negative në shkolla, ndër të cilat: Identifikimi i dukurive negative në shkolla dhe faktorët që ndikojnë në shfaqjen e tyre, dhuna fizike dhe psikologjike ndërmjet nxënësve dhe mënyrat për parandalimin e saj, bullizmi dhe ngacmimi në shkolla, përdorimi i substancave narkotike, alkoolit dhe duhanit, si dhe masat parandaluese, ndikimi i rrjeteve sociale dhe internetit në sjelljen dhe zhvillimin e të rinjve, fuqizimi i nxënësve dhe të rinjve për të reaguar ndaj dhunës dhe dukurive negative, rritja e bashkëpunimit ndërmjet shkollave, institucioneve lokale dhe komunitetit për krijimin e një mjedisi të sigurt për fëmijët dhe të rinjtë.

Drejtori i Arsimit, z. Selami Klaiqi, theksoi rëndësinë e parandalimit të dukurive negative në shkolla dhe krijimit të një mjedisi të sigurt për të gjithë nxënësit. Ai vlerësoi se parandalimi i dhunës dhe dukurive të tjera negative kërkon bashkëpunim të vazhdueshëm ndërmjet shkollave, prindërve, nxënësve dhe institucioneve.

Dua të falënderoj OJQ Dardanapress për organizimin e këtij debati dhe për angazhimin në adresimin e çështjeve që lidhen me sigurinë dhe mirëqenien e të rinjve.

“Vetëm përmes bashkëpunimit dhe komunikimit të vazhdueshëm mund të krijojmë shkolla më të sigurta dhe një mjedis ku çdo nxënës ndihet i respektuar dhe i mbështetur”, u shpreh z. Klaiqi.

Në këtë debat morën pjesë: Drejtori i Arsimit, z. Selami Klaiqi, drejtorët e shkollave dhe përfaqësues të Drejtorisë së Arsimit.

Projekti “Ta ndalojmë dhunën dhe dukuritë negative – Fuqizimi i rinisë për një mjedis të sigurt” është financuar nga Komuna e Kamenicës, përkatësisht nga Drejtoria për Kulturë, Rini dhe Sport. /2LONLINE/