CNN për ndërkombëtarizimin e futbollit kosovar

​Rrjeti i njohur televiziv amerikan i lajmeve, CNN në një raport promovues të Botërorit 2014 në Brazil që do të hapet më 12 qershor, i ka kushtuar një hapësirë të konsiderueshme futbollit të Kosovës dhe orvatjeve të kosovarëve për të depërtuar në futbollin evropian dhe botëror.

Raporti i CNN-it ofron një përmbledhje gjithëpërfshirëse të përpjekjeve të popullit të Kosovës përgjatë viteve për t’u bërë pjesë e futbollit ndërkombëtar dhe njëherit “gjësë dytësore më të rëndësishme në tërë rruzullin tokësor”.

Në raport përshkruhen vuajtjet e futbollit kosovar gjatë regjimit shtypës të Serbisë së Millosheviqit, dhe që kosovarët edhe atëbotë u dolën ballë të gjitha sfidave duke organizuar ligën e tyre paralele.

CNN shfaq kryeministrin e Republikës së Kosovës, Hashim Thaçi, duke e pranuar fanellën me emrin e tij të Përfaqësueses së Kosovës në prag të ndeshjes së parë historike ndërkombëtare të Kosovës ndaj Haitit të zhvilluar në stadiumin olimpik “Adem Jashari”, më 5 mars të këtij viti, në Mitrovicë.