Çmimet rriten çdo ditë – qytetari po vidhet në heshtje!

Shkruan: Arlind Vokshi

Në çdo cep të tregut, çdo ditë, po ndodh një rritje e çmimeve që askush nuk po e shpjegon. Produktet bazë janë shtrenjtuar në mënyrë të paarsyeshme, ndërsa institucionet duket sikur vetëm vëzhgojnë nga larg, duke heshtur para një krize që po godet direkt xhepin e qytetarit.

Paralajmërimet për rritjen e çmimit të bukës janë alarm serioz. Si është e mundur që në qendra tregtare buka shitet më lirë se në furra? Dhe më keq – si ka mundësi që shumë furra nuk përdorin fare arkë fiskale? A nuk është ky shkelje e drejtpërdrejtë e ligjit?

Pse nuk zbatohet ligji njësoj për të gjithë?

Pse qytetari i zakonshëm duhet të paguajë çdo taksë dhe gjobë në kohë, ndërsa bizneset që abuzojnë me çmime dhe ligje nuk preken? Ky është keqpërdorim i rregulloreve të çmimeve dhe dështim i mekanizmave të kontrollit.

Qytetari nuk po jeton – po varfërohet e po mashtrohet çdo ditë.

Është koha për inspektim real, transparencë dhe ndëshkim për abuzuesit. Përndryshe, çdo paralajmërim për “stabilitet ekonomik” është vetëm një mashtrim tjetër mbi supet e një populli që po lodhet gjithnjë e më shumë.  /2LONLINE/