Chelsea dhe Reali në çerekfinale

Skuadra e Chelseat nuk ka lejuar befasi. Të kaltrit e Londrës, të martën në mbrëmje, e kanë mposhtur skuadrën turke, Galatasaray, 2:0, në “Stamford Bridge”, në ndeshjen e kthimit të 1/8 së finale në Ligën e Kampionëve. Kësisoj, skuadra e Jose Mourinhos është kualifikuar në mesin e tetë më të mirave të garës elitare të futbollit evropian, pasi ndeshja e parë në Stamboll ishte mbyllur pa fitues, 1:1.

Londinezët e nisën shumë mirë ndeshjen dhe qysh në minutën e 4-t kaluan në epërsi, me golin e shënuar nga Samuel Eto’o. Ndërkohë, tre minuta para shkuarjes në pushim epërsinë e dyfishoi Gary Cahill, me çka i krijoi komoditet skuadrës së tij, e cila deri në fund bëri lojë të sigurt, duke mos e rrezikuar kualifikimin, transmeton RTK.

Ndërkohë, në ndeshjen tjetër Real Madridi e mposhti Schalken, me rezultat 3:1, duke i mbyllur 180 minutat e përballjes me gjermanët me rezultat të përgjithshëm 9:2. Dy gola për ‘mbretërit’ i shënoi
Cristiano Ronaldo 21’ e 74’, derisa me një gol kontribuoi Alvaro Morata 75’. Ndërkaq, golin e vetëm për Schalken e shënoi Tim Hoogland 31’.

Nesër zhvillohen dy ndeshjet e fundit të 1/8 së finales, në të cilat ballafaqohen Borussia Dortmund – Zenit dhe Manchester United – Olympiakos.

KOMENTE