“Buxhetimi me Pjesëmarrje” ka filluar me takimin në lagjen “Zabel…”

Dëgjimet e para publike të Komunës së Gjilanit me qytetarë të disa lokaliteteve në kuadër të “Buxhetimit me pjesëmarrje”, kanë filluar me takimin që është mbajtur mbrëmë në Lagjen “Zabeli i Sahit Agës”.

Në takim me qytetarët e pranishëm të kësaj lagjeje mori pjesë edhe kreu i komunës së Gjilanit, Alban Hyseni. Ai foli për rëndësinë e Buxhetimit me pjesëmarrje, duke inkurajuar të pranishmit për propozime të projekteve të rëndësishme për lagjen e tyre.

Pasi organizatori tregoi për kriteret që duhet të përmbushen për t’u përfituar projekti i një formati të tillë të takimit që komuna e realizon me qytetarët, nëpër  lokalitete, në ktë rast me qytetarë të kësaj lagjeje, pas më shumë propozimeve të bëra, u veçuan pesë propozimet e qytetarëve, të cilat u përkrahën më së shumti nga të pranishmit, e më pas në takim e radhës do të votohet për njërin nga to.

1. Fusha e volejbollit

2. Rregullimi i hapësirës rekreative-sportive

3. Këndi i lodrave për fëmijë

4. pastrimi dhe mbulimi i lumit

5. Vendosja e shportave për mbeturina përgjatë rrugëve

Në takim morën pjesë qytetarë, drejtorë dhe zyrtarë të drejtorive komunale.

“Në Zabel do të kthehemi më 26 maj, me procesin e votimit për projektin që do të realizohet në lagje për komunitetin. Lagjja jote, vendimi yt”, thanë organizatorët e këtij takimi.

Kujtojmë se vlera e projektit që do të mbështetet do të jetë 50 mijë euro. 

Përndryshe, dëgjimet e tilla publike do të vazhdojnë dhe për sonte është e paraparë me banorë të lagjes “Rruga e Prishtinës”. /2LONLINE/