Bunjaku Rexhepi: Institucionet komunale gjunjëzohen para veprës heroike të Ibrahim Uruqit

/2L ONLINE/ – Institucionet komunale të Gjilanit kanë shënuar sot 16-vjetorin e rënies së dëshmorit të kombit, Ibrahim Uruqi. Kryesuesja e Kuvendit, Valentina Bunjaku Rexhepi me bashkëpunëtorët nga Komuna e Gjilanit, ka vënë kurora lulesh para bustit të dëshmorit në fshatin Bresalc, ndërsa më pas është shënuar dita e shkollës e këtij fshati që e mban emrin e këtij kolosi të kombit.

Në tubimin madhështor, kryesuesja Valentina Bunjaku Rexhepi, e cila ka folur në emër të kryetarit Lutfi Haziri, ka thënë se institucionet komunale gjunjëzohen para veprës heroike të Ibrahim Uruqit, i cili u sakrifikua për lirinë e shqiptarëve.

“Sot po bëhen 16 vite nga rënia heroike e Ibrahim Uruqit, vepra e madhe e të cilit na ka bashkuar ne sot këtu dhe na bënë të ndihemi të obliguar dhe të përgjegjshëm që sakrifica e tij dhe e gjithë dëshmorëve të kombit të çmohet dhe të ecim përpara. Ne gjunjëzohemi para veprës së tij, ndërsa ju gjenerata të nxënësve jeni krenar që mësoni këtu dhe në librat, fletoret e ditarët tuaj e shkruani emrin e Ibrahimi Uruqit”, ka thënë Bunjaku Rexhepi.

Nga ana e tij, ish-komandanit i Zonës Operative të Karadakut, Ahmet Isufi, ka thënë se në kohën kur kishte humbur shpresa, Ibrahim Uruqi dhe shokët e tij po e kthenin shpresën.

“Sot jemi mbledhur për të përkujtuar figurën e ndritshme e cila i dha kombit një simbolikë, i dha kombit një emër dëshmori që quhet Ibrahim Uruqi. Në kohën kur kishte humbur shpresa, Ibrahim Uruqi dhe shokët e tij po e kthenin shpresën. Atëherë kur Kosova kishte errësirë, Ibrahimi dhe shokët e tij po e ndriçonin Kosovën. Krismat e Ibrahimit dhe shokëve të tij sollën lirinë e Kosovës, që sot të kemi arsim, jetë, dituri dhe të ecim përpara”, ka thënë Isufi.

Gafurr Syla, drejtor i shkollës fillore “Ibrahim Uruqi”, ka folur për sukseset dhe sfidat e funksionimit të kësaj shkolle, duke thënë se me ndihmën Drejtorisë Komunale të Arsimit, donatorëve, posaçërisht organizatës gjermane GIZ, është bërë renovimi i 12 dhomave të mësimit, janë sjellë pajisje me inventarë si dhe janë sjellë 12 tabela lëvizëse moderne, derisa priten edhe investime tjera nga institucionet komunale.

Kremtja e ditës së shkollës u mbyllë me një program të pasur kulturor-artistik nga nxënësit e shkollës fillore “Ibrahim Uruqi” të fshatit Bresalc. /2L ONLINE/