Bunjaku-Rexhepi: Femrat në LDK kanë hapësirë të madhe veprimi

(2L ONLINE) – Kryetarja e Forumit të Gruas të Lidhjes Demokratike të Kosovës në Gjilan, Valentina Bunjaku-Rexhepi, ka ftuar për herë të parë në takim anëtaret e reja, të cilat iu bashkuan LDK-së javë më parë dhe kanë hyrë në kryesi dhe komisione përkatëse të Degës.

Bunjaku Rexhepi iu uroi mirëseardhje zonjave që iu bashkuan LDK-së, ndërsa u tha se në këtë shtëpi ka vend për të gjitha femrat, të cilat në zgjedhjet e fundit ishin promotor i fitores plebishitare.

Pikë e rendit të ditës ka qenë mobilizimi dhe koordinimi i aktiviteteve për zgjedhjet nacionale, të cilat do të mbahen më 8 qershor.

Kryetarja e FG-së, Valentina Bunjaku Rexhepi, njëherit kryesuese e Kuvendit Komunal të Gjilanit, është shprehur se do të punojmë 24 orë për mbështetur fitoren e LDK-së, në krye me kryeministrin e ardhshëm Isa Mustafa.

“Forumi i Gruas i LDK-së në Gjilan është i hapur për të gjitha femrat gjilanase që dëshirojnë t’i bashkangjiten ndryshimit të madh pozitiv për Kosovën. Jam e sigurtë që edhe në këto zgjedhje do të punoni pa ndalur, për ta bërë fitoren edhe më të madhe, në krye me kryeministrin Isa Musatafa”, tha Bunjaku Rexhepi.

Anëtaret e reja, të cilat iu bashkuan LDK-së, e të cilat janë futur në kryesi të FG-së me votim, janë shprehur falënderuese për hapësirën e krijuar për veprim në parti, duke thënë se ky është shembulli më i mirë i funksionimit demokratik. /2l Online/