Brovina: I pres që të vijnë

Deputetja Flora Brovina në një bisedë për “Epokën e re”, shpreson se liderët e koalicionit LDK-AAK-Nisma do të ndryshojnë qëndrim dhe do të marrin pjesë në takimin e sotëm konsultativ që ka për qëllim caktimin e datës së seancës konstitutive të Kuvendit.

“Kur i kam ftuar kam pritur se ata do të vijnë. Dhe pres që ata të vijnë në takim, sepse qëllimi i takimit është të merremi vesh vetëm për datën e vazhdimit të seancës konstituive të Kuvendit të Kosovës. Unë kam mundur vetë ta thërras vazhdimin e seancës konstituive, por nuk kam dashur që ata të më thonë se unë vendosa krye në vete”, ka thënë Brovina.

Ajo ka bërë me dije se me ose pa praninë e liderëve të koalicionit LDK-AAK-Nisma do ta caktoj datën për mbajtjen e seancës konstituive. Takimi është paraparë të mbahet sot (e enjte) në orën 11:00 në ambientet e Kuvendit të Kosovës.