Biblioteka Publike e Qytetit në Viti emërtohet “Ramadan Musliu“

Biblioteka Publike e Qytetit në Viti emërtohet “Ramadan Musliu“

Nga sot, biblioteka e qytetit të Vitisë, merr emrin e shkrimtarit, publicistit dhe gazetarit Ramadan Musliu. Shpalosjen e pllakës me emrin e bibliotekës, e bënë kryetari i komunës së Vitisë Sokol Haliti dhe djali i të ndjerit, Ramadan Musliu, Mendim Musliu.

Në fjalën e tij, kryetari i komunës së Vitisë Sokol Haliti, u shpreh se ndjen kënaqësinë që në cilësinë e kryetarit të komunës, të jetë i pranishëm në një ceremoni sa të rëndësishme, po edhe aq të ndjeshme në aspektin emocional, pasi që ka të bëjë me një personalitet shumë të dashur për ne të gjithë, e i cili tani më nuk gjendet mes nesh vetëm fizikisht.

“E them këtë, ngase krijuesit, shkrimtarët e artistët, i bënë të pavdekshëm veprimtaria e tyre jetësore. Shpesh na bien të mendojmë se poetët janë në shoqëri të përhershme të vdekjes, ngase në krijimet e tyre, hyjnë e gërmojnë edhe përtej kësaj bote. Dhe, duke qenë në shoqërinë e përhershme të Vdekjes, vetë Vdekja duket se shpesh bie në dashuri me Poetët, duke i rrëmbyer para kohës në mbretërinë e vet të mistershme. Fundja kjo është dhe hakmarrja e Vdekjes për pavdekshmërinë e tyre. Edhe Ramadan Musliun, si duket vdekja e morri para kohe. Këtë nuk e priti as Dani, por as ne, por ja që ky përcaktim nuk varet nga askush.”, tha Haliti.

Më tej, ai shtoi se krijimtaria letrare e Ramadan Musliut, ka arrit që të jetë prezentë në vitrinat e shumë titujve jo vetëm në viset ku jetojnë shqiptarët, por edhe në shumë vende të botës dhe të përkthyer në shumë gjuhë të huaja, që na bënë krenar jo vetëm neve si bashkëqytetarë të tij, por edhe si një komb të tërë.

Ndërsa përgjegjësja e bibliotekës së qytetit “Ramadan Musliu”, Sadije Dauti, theksoi se jo rastësisht është lënë që në këtë datë të emërtohet biblioteka me emrin e ri, sepse kjo koincidon edhe me Ditën Ndërkombëtare të Librit.

 “Është ditë e veçantë, historike dhe e rëndësishme sepse mu në ditën e librit, biblioteka jonë po merr emrin e ri. Kjo datë do të shënohet në Viti, posaçërisht në bibliotekën tonë me dy data të rëndësishme, si dita e librit dhe dita e bibliotekës”, u shpreh ajo.

Për biografinë jetësore të Ramadan Musliut, foli Zymrije Salihu e Sylë Ukshini ish ambasador i Kosovës në Shqipëri, ndërsa për krijimtarinë jetësorë bashkëpunëtori më i ngushtë, Jusuf Buxhovi, i cili mes tjerash u shpreh se e ka të vështirë të flas për Ramadanin, sepse e kishte një mik dhe bashkëpunëtor të ngushtë.

 “Ramadani do të më mungoj mua si mik që e kisha, si bashkëpunëtor, por ai do ti mungoi shumë edhe letrave shqipe. E kisha bashkautor të disa nga librat e mija, sepse e kisha jo vetëm redaktor, por edhe mentor”, tha Buxhovi, duke evokuar kujtime nga e kaluara e krijimtarisë letrare me Ramadan Musliu.

Në kuadër të aktiviteteve për emërtimin e bibliotekës, po ashtu u promovua edhe libri më i fundit i autorit Ramadan Musliu “Diell pa Hije”, ndërkohë që në fund të pranishmin vizituan edhe një ekspozitë e opusit letrar të Ramadan Musliut.

Të theksojmë se publicisti dhe kritiku letrar Ramadan Musliu, ndërroi jetë më 22 tetor të vitit 2020. /2LONLINE.com/

KOMENTE