Biblioteka “Fan S. Noli” përcolli në pension Shpresë Hajdari-Vokshin, vlerësohet kontributi i saj i madh në kulturë

Në një ceremoni të organizuar nga kolektivi i Bibliotekës së Qytetit “Fan S. Noli” në Gjilan, është përcjellë në pension punëtorja shumëvjeçare e institucionit, znj. Shpresë Hajdari-Vokshi, e cila për dekada të tëra kontribuoi në jetën kulturore dhe qytetare të Gjilanit.

Shpresë Hajdari-Vokshi kishte filluar punën si librare në Bibliotekën e Qytetit në vitin 1981, në moshën 20-vjeçare. Që nga rinia e saj, ajo u dallua si një veprimtare e përkushtuar në fushën e kulturës dhe artit, duke thyer shumë tabu të kohës përmes angazhimeve të ndryshme artistike e kulturore, transmeton 2LONLINE.

Përveç punës në bibliotekë, ajo ishte e angazhuar edhe në Teatrin e Gjilanit, ku interpretoi në role të ndryshme, si dhe në ansamblet kulturore të qytetit. Hajdari-Vokshi konsiderohej një nga figurat më aktive në organizimin dhe udhëheqjen e aktiviteteve kulturore të kohës, duke kontribuar edhe në sektorë të ndryshëm komunalë që lidhen me edukimin, kulturën dhe qytetarinë.

Gjatë periudhës së okupimit në Kosovë, ajo ishte anëtare e Komisionit Komunal për Kulturë dhe Sport.

Angazhimin institucional ajo e vazhdoi si drejtoreshë e Drejtorisë për Kulturë, Rini dhe Sport në Gjilan, ndërsa ishte aktive edhe si ansambliste në Kuvendin Komunal të Gjilanit, transmeton 2LONLINE.

Shtatë vitet e fundit të karrierës së saj profesionale, Shpresë Hajdari-Vokshi i kaloi në sektorin e përpunimit të librit në Bibliotekën “Fan S. Noli”.

Në ceremoninë e pensionimit, kolegët e uruan për ditëlindjen dhe përmbylljen e karrierës së saj profesionale, duke e vlerësuar si “zërin më autokton të avancimit të kulturës dhe qytetarisë në Komunën e Gjilanit”.

Kolektivi i bibliotekës i uroi znj. Hajdari-Vokshi shëndet, qetësi dhe jetë të lumtur pranë familjes. /2LONLINE/