BIBL gjobit Prishtinën për djegien e flamurit të Maqedonisë

Liga Ballkanike ka gjobitur me 1 mijë e 250 euro klubin basketbollistik “Sigal Prishtina”, pasi në ndeshjen e fundit të zhvilluar në kryeqytetin kosovar kundër “KK Kumanovo”, tifozët e saj kishin nisur të djegin flamurin e Maqedonisë, transmeton “Koha.net”.

Lajmin e kanë dhënë “Plisat”, bashkë me një thirrje për anëtarët e vetë që kjo mos të përsëritet. Ata e kanë postuar edhe fotografi të vendimit të BIBL.

“Shihni dënimet që ‘KB Prishtina’ i ka marrë në lojën e kaluar ndaj ‘KK Kumanovës’. Kjo vjen pas djegies së flamurit maqedon në sallë dhe disa sharjeve raciste të cilat disa njerëz pa urdhër të ‘Plisave’ e kanë bërë.

I lusim të gjithë ‘Plisat’ që çdo ekses brenda tribunës ta lajmërojnë në kryesinë e ‘Plisave’”, është shkruar në këtë status. “Ashtu siç po shihet në dënime, përsëritja e këtyre gjerave rezulton me përjashtimin e ‘KB Sigal Prishtina’ nga Liga Ballkanike. Ejani ta përkrahim ekipin tonë të zemrës dhe të tregojmë kulturë. Interesimi është mjaft i madh dhe ejani sa ma herët”, ka vazhduar ky status.

Nëse ky veprim përsëritet Prishtina mund të ndëshkohet me 5 mijë euro dhe të përjashtohet nga kjo ligë, thuhet në letrën që mban firmën e drejtorit sportiv Shay Shtriks.

Prishtina zhvillon sonte (17:30) ndeshjen e radhës në kuadër të garave në Ligën Ballkanike, kundër kampionit aktual Galil Gilboa. Sigal Prishtina aktualisht renditet në pozitën e katërt në tabelë me 16 pikë, sa i ka edhe Galil Gilboa në vendin e dytë, por me një ndeshje më pak. Ekipi i kryeqyteti në ndeshjen e parë me Galil Gilboan, të zhvilluar në Izrael, pati pësuar humbje me shifrat 71:66.

Prishtina në total ka katër humbje, prej të cilave tri i ka regjistruar në katër ndeshjet e fundit.