Betohen 344 ushtarë të rinj të FSK-së

Në kazermën e Forcës së Sigurisë së Kosovës, “Skënderbeu” në Ferizaj, sot u mbajt ceremonia e betimit të 344 ushtarëve të rinj.

Në këtë ngjarje të rëndësishme morën pjesë Presidentja e vendit, Vjosa Osmani Sadriu, Kryeministri Albin Kurti, ministri i Mbrojtjes, Ejup Maqedonci, zëvendësministri Shemsi Syla, komandanti i FSK-së, gjenerallejtënant Bashkim Jashari, zëvendëskomandanti i FSK-së, gjeneral Major Enver Cikaqi, si dhe gjeneralë, oficerë dhe nënoficerë të FSK-së dhe ata ndërkombëtarë. Po ashtu, të pranishëm ishin edhe familjarët dhe miqtë e rekrutëve të rinj.

Me këtë rast, ministri Ejup Maqedonci përgëzoi ushtarët e rinj duke theksuar rëndësinë e përkushtimit dhe vullnetit të tyre për t’i shërbyer atdheut. “Në këtë kohë sfidash për sigurinë globale dhe vendore, zhvillimi i kapaciteteve ushtarake është esencial. Dhe e them me bindje e gëzim që sot ushtria e Kosovës është shumë më e fuqishme, më e pajisur dhe më e përgatitur se asnjëherë më parë, me sisteme të avancuara të armatimit dhe me të rinj e të reja që, me guxim dhe përkushtim të pashoq, i shërbejnë Republikës së Kosovës”, tha mes tjerash ministri Maqedonci.

Ushtarët e rinj të cilët u betuan sot, u trajnuan për 9 javë pranë Qendrës për Stërvitje Bazë në Komandën e Doktrinës dhe Stërvitjes ( KDS ) në Ferizaj, ku mësuan hapat e parë të jetës ushtarake dhe morën njohuritë bazë taktike ushtarake për të qenë të gatshëm për të shërbyer në  Forcën e  Sigurisë së Kosovës.  /2LONLINE/