“Beogradi t’i motivojë serbët që të inkuadrohen në institucionet kosovare”

Raportuesi për Serbinë në Parlamentin Evropian, Jelko Kacin i ka bërë thirrje Beogradit që t’i motivojë serbët e veriut që të inkuadrohen në institucionet e Kosovës. Eurodeputeti Kacin për të përditshmen ‘Danas’, ka thënë se Beogradi duhet të sigurohet se të gjithë policët edhe shërbyesit e tjerë shtetërorë, të jenë të informuar me materien e marrëveshjes se Brukselit.

”Beogradi duhet të jetë i sigurt që të gjithë policët, por dhe nëpunësit tjerë shtetërorë të jenë tërësisht të informuar për të drejta e tyre dhe për mundësitë që dalin nga Marrëveshja e Brukselit. Vetëm një pjesëtar i policës nga bashkësia serbe është paraqitur në konkursin që ka shpallur Policia e Kosovës. Duhet inkurajuar njerëzit të pranojnë mundësi të reja dhe kështu ata të sigurojnë të ardhmen në Kosovë”.

Kacin ka vlerësuar se me miratimin e Ligjit për rrjetin e gjyqeve praktikisht janë suspenduar gjyqet e Serbisë në Kosovë si dhe gjyqet që kanë pasur kompetenca mbi Kosovën.

Beogradi e Prishtina duhet të bëjnë edhe më shumë përpjeke të përbashkëta për ta mundur krimin në veri të Kosovës i cili atje ka metastazuar gjatë vakuumit juridik me vite e në hije të të ashtuquajturave struktura paralele, ka thënë Kacin. Për Kacinin, zbatimi i Marrëveshjes së Brukselit është çelës i përparimit ë Serbisë në në integrimet evropiane.