Barazimi i diplomës së Universitetit Publik s me ato të Kolegjeve Private, është politik, tendencioz dhe i papranueshëm

/2L ONLINE/ – Këshilli i Studentëve i Fakultetit të Edukimit në Universitetin e Prishtinës “HASAN PRISHTINA” ka marrë shumë shqetësime nga studentët dhe të diplomuarit e këtij fakulteti nga të gjitha qendrat e tij, në raport me vendimin 231 / 01B të ministrit të Arsimit Arsim Bajrami, për të barazuar studentët e diplomuar në Fakultetin e Edukimit të UP-së me ata të Kolegjeve Private.

Kushtrim Tërshana, kryetar, ka thënë se të gjithë e dimë se profesioni i mësimdhënësit është i shenjtë dhe si i tillë duhet të përcillet me kuadro të filtruar, që do të përgatisnin denjësisht gjeneratat e reja.
Andaj konsiderojmë që barazimi i diplomës së Universitetit Publik të Prishtinës me ato të Kolegjeve Private, është politik, tendencioz dhe i papranueshëm.

“Aktualisht në Kosovë kemi numër të madh të të diplomuarve që kanë profesionin e mësimdhënësit e të cilët janë të papunë për shkak të konkurrencës së madhe dhe padrejtësive që përjetojnë nëpër konkurse, e nëse këtyre do të ju shtoheshin edhe të diplomuarit nga kolegjet private do të rëndonte edhe më shumë situatën e tyre”, ka thënë Tërshana .

Sipas tij, prandaj, vendime të tilla mund të bëhen për cdo profesion tjetër që mund të dal nga UP-ja dhe institucionet tjera bartëse të arsimit të lartë, por duhet në mënyrë të prerë të dallohet e ruhet profesioni i mësimdhënësit pasi që është shtylla kryesore e një shteti e kombi.

“Kërkojmë nga MASHT-i, që të rishikoj këtë vendim, në mënyrë që të mos ketë reagime të tjera nga studentët e të diplomuarit e këtij fakulteti”, ka thënë Tërshana në emër të .Këshillit të Studentëve i Fakultetit të Edukimit në Universitetin e Prishtinës. /2L ONLINE/