Baladë për dy hyjni

Nga Isuf Sherifi

BALADË PËR DY HYJNI

(Gurselit dhe Bajramit)

Rinisën përpjetëzën
Përlindjet për liri
Në themel dhe majë drite
Janë edhe Ata të Dy.

Njëri mjeshtër i magjikes n’pëlhurë
Tjetri i magjikes n’celuloid
Së bashku krijonin
Mrekullitë më të ndritura në botë.

Kur njëri mbi supe vendoste diellin
Tjetri ndillte pranverën
Atdheut i këndonin këngën e zgjimit
Territ nën këmbë ia shembnin dimrin.

Rinisën përpjetëzën
Përlindjet për liri
Në themel dhe majë drite
Janë edhe Ata të Dy
Si gjysmë perëndi.

E zaptuan vdekjen
Thonjtë ia ngulën
Shpërfaqën të vërtetën
Për Dritën dhe Jetën.

Roje të përjetshme
Engjuj mbi Arbëri
Tek koka dhe këmbët
I ke amulet, oj Arbëri.

Njëri mjeshtër i magjikes n’pëlhurë
Tjetri i magjikes n’celuloid
Së bashku krijonin
Mrekullitë më të ndritura në botë.

Rinisën përpjetëzën
Përlindjet për liri
Në themel dhe majë drite
Janë edhe Ata të Dy
Si një perëndi.