Bajram Isufi: Do të mbështesim zhvillimin e bujqësisë edhe këtë vit

“Edhe sivjet Drejtoria për Bujqësi e Komunës së Gjilanit do të vazhdojë angazhimin e saj për të siguruar realizimin e projekteve në të mirën e bujqve”, ka thënë Bajram Isufi, drejtor i kësaj Drejtorie, për të shtuar se njëri ndër prioritetet e veçanta do të jetë mbështetja e sektorëve më të rëndësishme të bujqësisë.

Më tej ai theksoi se do të përfshihet përmirësimi i kapaciteteve teknologjike dhe ofrimi i asistencës për fermerët, me qëllim rritjen e konkurrueshmërisë së sektorit bujqësor dhe krijimin e mundësive më të mira për zhvillimin e tij.

“Drejtoria për Bujqësi, do të mbështet zhvillimin e sektorit bujqësor, përmirësimin e kushteve të punës dhe jetesës së fermerëve, si dhe nxitjen e zhvillimit të qëndrueshëm dhe rritjen e konkurrueshmërisë së këtij sektori”, tha Isufi.

Drejtori për Bujqësi shtoi tutje se presin që të realizojnë një numër projektesh për mbështetjen e fermerëve dhe të sektorit të bujqësisë, me fokus në rritjen e kapaciteteve profesionale të fermerëve, zhvillimin e infrastrukturës bujqësore, subvencionimin e sektorëve me interes për bujqësinë, mekanizimin bujqësor, si dhe ofrimin e asistencës për fermerët e interesuar për aplikim në subvencione dhe grante të ndara nga Ministria e Bujqësisë, Pylltarisë dhe Zhvillimit Rural.

“Të gjitha këto aktivitete kanë qëllim përmirësimin e kushteve të jetesës së fermerëve dhe ndikimin e drejtpërdrejtë në zhvillimin ekonomik të Komunës së Gjilanit”, ka thënë drejtori Isufi.  /2LONLINE/