Azemi: Një opozitë që nuk vepron, është po aq fajtore sa një qeveri që dëmton shtetin

Ardian Azemi, Sekretari i Përgjithshëm i Aleancës për Ardhmërinë e Kosovës (AAK), Dega në Gjilan, ka thënë se një opozitë që nuk vepron, është po aq fajtore sa një qeveri që dëmton shtetin.

“LDK-ja i bën dëm Kosovës dhe vetes njësoj, qoftë duke qëndruar në opozitë, qoftë duke iu bashkuar Kurtit në bashkëqeverisje”, thotë Azemi.

Siaps tij, çdo parti opozitare që i shkon Kurtit për të formuar qeverinë, dëmton rëndë Kosovën dhe veten. Po aq përgjegjëse janë edhe nëse nuk marrin hapa konkretë për të formuar një qeveri nga shumica shqiptare, e cila sot gjendet te partitë opozitare.

“Është papjekuri politike të thuash: “Qytetari na ka dhënë votë për të qenë opozitë.” Jo, i nderuar! Qytetarët kanë dhënë votë për të ndryshuar gjendjen në Kosovë. Prandaj, është përgjegjësi e PDK-së, LDK-së dhe AAK-Nismës që t’ia pamundësojnë Vetëvendosjes – Listës Guxo – Alternativës të vazhdojnë degradimin e Republikës”, thotë Ardian Azemi i AAK-së.

Sipas tij, nëse dikush ka kohë për të pritur, Kosova jo.

“Bota dhe rajoni po përjetojnë zhvillime që po ndryshojnë rendin global, ndërsa ne merremi me pallavra. Historia nuk i fal as ata që shkatërrojnë, as ata që i shikojnë duarkryq. Kur vendi po rrëshqet, çdo ditë hezitimi është një hap më pranë humnerës”, thotë Ardian Azemi, Sekretari i Përgjithshëm i Aleancës), Dega në Gjilan . /2LONLINE/