Azemi (AAK): Kështu po shkojnë taksat tona, Marre!
“Kështu po shkojnë taksat tona. Marre!”, thotë në një reagim të tij, Ardian Azemi, Sekretari i Përgjithshëm i Aleancës për Ardhmërinë e Kosovës (AAK), Dega në Gjilan.
Ai thotë tutje se nuk mban mend të ketë pasur një lajm të mirë për këtë qytet në katër vitet e fundit. Vetëm skandale, keqpërdorime dhe dështime.
“Erdhën në pushtet duke thënë: ‘20 vjet e kanë shkatërruar Kosovën’. Po ju e dini si ishte Kosova para çlirimit dhe e dini si e gjeti Vetëvendosja ditën që mori pushtetin. E po ashtu, e shihni ku është sot Gjilani dhe Kosova nën qeverisjen e tyre – në degradim të plotë nga mashtrues, hajna dhe arrogantë”, thotë tutje Azemi.
Sipas tij, rruga Gjilan-Ferizaj e shkatërruar! Duket sikur është goditur me predha.
“Nuk ka dhjetë metra pa gropa e gunga. Vonesa të pafundme në ndërtim, dëme për bizneset dhe banorët, ndërhyrje të njëpasnjëshme duke hequr asfaltin, e prapë shihni çfarë katastrofe është bërë. Kështu po shkojnë taksat tona. Marre”, thotë Ardian Azemi, Sekretar i Përgjithshëm i AAK-së së Gjilanit. /2LONLINE/