As Komuna e Gjilanit e as ajo e Vitisë nuk i hapen sot çerdhet publike

As Komuna e Gjilanit e as ajo e Vitisë nuk i hapen sot çerdhet publike

Që nga 11 Marsi, për shkak të rrezikut nga pandemia COVID-19, Qeveria e Republikës së Kosovës mori vendim për mbylljen e institucioneve shkollore, përfshirë këtu edhe çerdhet. Por, Qeveria e Kosovës në mbledhjen e mbajtur dje, në kuadër të lehtësimit të masave ndaj pandemisë COVID-19, ka marrë vendim edhe për hapjen e çerdheve, por që sot këto nuk janë hapur në disa komuna, përfshirë edhe Gjilanin edhe Vitinë, për shkak të, siç u tha, mungesës së informatave të mjaftueshme si dhe me kohë, me qëllim që të ndërmerren masat e duhura për të qenë ato të gatshme.

Nënkryetari i Komunës së Gjilanit, Arbër Ismajli ka thënë se në njoftimin për çerdhet që me vendimin e qeverisë mund të fillojnë sot, Gjilani nuk do ta bëjë këtë, sepse është vlerësim i profesionistëve, që ato duhet të dezinfektohen dhe të sigurohet plotësisht që gjithçka është gati për t’i hapur ato, transmeton Portali 2LONLINE.com.

“Sot dhe nesër do ta bëjmë dezinfektimin e çerdheve dhe vlerësimi profesional se a është gjithçka në rregull për të filluar puna, në mënyrë që fëmijët e Gjilanit të jenë të sigurt në Institucionet parashkollore”, ka thënë Ismajli, transmeton 2LONLINE.com.

Ndërsa në Viti, çerdhja “Gëzimi Ynë”, e vetmja publike në këtë komunë, ka njoftuar se ky institucion sot, më 1 qershor, nuk do të fillojë punën, për shkak të nevojës për të bërë disa përgatitje para se të hapet, transmeton Plus Tv.

“Duke u bazuar në vendimin e Qeverisë dhe Ministrisë së Shëndetësisë së Republikës së Kosovës për të filluar punën nesër,ne ju njoftojmë se çerdhja “Gëzimi Ynë” nuk do ta fillon punën nesër për shkak të disa përgatitjeve që i kemi në përfundim e sipër. Për datën e fillimit ju njoftojmë ditët në vazhdim”, thuhet në njoftim, transmeton Plus Tv.

Kurse, për ndryshim nga “Gëzimi Ynë” në Viti çerdhja private Hello, është hapur dhe ka filluar punën.


KOMENTE