As Haziri e as Rashiti nuk i përgjigjen ftesës së kryetarit Hyseni për takim

Ndonëse kishte kaluar ora 10:00, e paraparë për takim, ulëset e zbrazët pran të cilave ishin vendosur emrat e të ftuarve në takim, paralajmëronin dështimin e këtij takimi.

Ditë më parë, kryetari i Komunës së Gjilanit, Alban Hyseni u kishte bërë ftesë publike, kryetarit të LDK-së, Lutfi Hazirit si dhe kryetarit të PDK-së, Riad Rashitit, që të takoheshin sot në ora 10:00, në selinë e kryetarit të komunës për të biseduar dhe gjetur bashkërisht zgjidhje për ngërçin që ka të bëjë me aprovimin e buxhetit të komunës së Gjilanit për vitin 2025, transmeton 2LONLINE.com.

Por, sot as kreu i LDK-së as kreu i PDK-së, nuk iu përgjigjën kësaj ftese. Në fakt, Riad Rashiti i PDK-së, ishte deklaruar mbrëmë rreth kësaj çështje (shih shkrimin: Ja cila është përgjigjja e PDK-së në ftesën për takim nga kryetari i Gjilanit), derisa kreu i LDK-së, Lutfi Haziri, ka ftuar për sot, ora 14:00, konferencë me gazetarë.

Përndryshe, kreu i komunës, Alban Hyseni ka mbajtur konferencë, pas dështimit të takimit dhe u ka bërë thirrje përsëri akterëve të opozitës, që të reflektojnë e të përgjigjeni në kërkesën qytetare për votimin e buxhetit. Ai ka paralajmëruar edhe takime tjera dhe seanca tjera urgjente.

Ndërkohë, pritet të mësohet qëndrimi i Hazirit të LDK-së, por edhe zhvillimet e mëtutjeshme për këtë çështje.  /2LONLINE/